Samferðslupakkin: Biðja aftur um longda freist

Samferðslupakkin skal viðgerast í hesi løgtingssetuni, men fíggjarnevndin hevur brúk fyri longdari freist, áðrenn hon er til reiðar at koma við einum áliti.

Tað váttar Erhard Joensen fyri Kringvarpinum í dag. 

Jørgen Niclasen, táverandi landsstýrismaður í fíggjarmálum, legði samferðslupakkan fyri tingið fyri jól. Pakkin inniheldur millum annað størri avgjøld á bensin og diesel, men afturfyri skal tað verða ókeypis at koyra gjøgnum Vága- og Norðoyatunnilin. 

Freistin longd fyrr

Fíggjarnevndin hevur longu einaferð fingið longda freist at koma við áliti. Freistin er 31. mars, t.e. um tríggjar dagar. 

Men nú váttar fíggjarnevndarformaðurin, at nevndin fer at biðja løgtingsformannin um at fáa freistina longda einaferð aftrat. 

Kríggið í Ukraina hevur gjørt bensin og diesel ein triðing dýrari, og spurningurin er, um fíggjarnevndin vil hækka prísirnar í kjalarvørrinum á hesum. 

Ætlanin er at avgreiða málið í hesi tingsetuni.