Hevur sett sjøtul á kanningarbeiðið

Ken Nónklett, advokatur, sum løgtingsformaðurin hevur tilnevnt kanningarstjóra í málinum um útluting av fiskirættindum í 2020 og 2021, hevur sett sjøtul á kanningarbeiðið.

Hann hevur fingið øll skjøl og allar umsóknirnar í málinum, bæði tær, sum fingu játtandi svar, og tær, sum vóru sýttar. 

Tilfarið skal gjøgnumgangast, og síðani verður støða tikin til, um neyðugt verður at hava avhoyringar.

Drúgv tilgongd

Tað gjørdist drúgv tilgongd at tilnevna kanningarstjóra, tí upprunaligi arbeiðssetningurin hjá teimum 15 tingfólkunum, sum vildu hava kanningarstjóra settan, var so umfatandi.

Fyrisitingin í løgtinginum gjørdi vart við, at grundarlag var ikki fyri at seta kanningarstjóra at kanna tíðarskeiðini frá 2010 og frameftir, eisini tíðarskeiðið 2018 og 19. 

Endin var, at Jógvan á Lakjuni, løgtingsformaður, gjørdi av, at kanningarstjórin bara skuldi kanna, um Jacob Vestergaard, fyrrverandi landsstýrismaður í fiskivinnumálum, umsat málsøkið á rættan hátt í sambandi við útluting av fiskirættindum í 2020 og 2021.

Liðug í hesum árinum 

Ken Nónklett, kanningarstjóri, veit ikki at siga, nær frágreiðingin verður liðug, men hann miðar eftir at verða komin undir land við henni í hesum árinum.

Eingin freist er ásett, nær frágreiðingin skal verða liðug.