Privata nýtslan og íløguhugurin minka

Kríggið í Ukraina fer at skunda undir prísvøksturin, sum longu var stórur, áðrenn Russland gjørdi innrás.

Tað stendur í Búskaparfrágreiðingini frá Fíggjarmálaráðnum, sum er løgd við uppskotinum um játtanarkarmar fyri næsta ár.

Prísirnir á matvørum og rávørum, olju og gassi, eru longu hækkaðir munandi, og teir fara væntandi at hækka enn meira.

Óvissan um útlitini kann fara at minka um privatu nýtsluna og hugin at gera íløgur.

Kríggið ávirkar føroyska útflutningin til Ukraina, Russlands og Hvítarusslands. Roknað verður við, at tað fer at bera til at finna aðrar útflutningmarknaðir, men tað verður fyri lægri prís.

Fíggjarmálaráðið, Tinganes, Ministry of Finance

Óvissa um fiskiveiðiavtalu

Óvissa er eisini um fiskiveiðiavtaluna millum Føroyar og Russland, og um tað yvirhøvur fer at bera til at gera fiskiveiðiavtalur við Russland næstu árini.

Høgi oljuprísurin fer helst at tálma vøksturin og privatu nýtsluna næstu árini, stendur í Búskaparfrágreiðingini.

Seinastu árini hava privatar og almennar íløgur verið munandi ískoyti til vøksturin í búskapinum.

Men kríggið í Ukraina og óvissan um útlitini fara sannlíkt at minka hugin hjá fyritøkum og húsarhaldum at gera stórar íløgur, men framvegis kann roknast við nógvum almennum og privatum íløgum næstu árini, sigur Fíggjarmálaráðið.