Ræðuleikar eisini aðrastaðni enn í Butja

Tekin eru um, at russisku herdeildirnar hava framt grov brotsverk aðrastaðni í Ukraina, enn í býarpartinum, Butja, har ukrainsku deildirnar funnu yvir 300 lík. Tey flestu vóru avrættað.

Nú sigur talskvinnan hjá amerikanska forsetanum, Jen Psaki, at tekin eru um sama slag brotsverk í øðrum býarpørtum, har ongar kanningar eru gjørdar enn.

Russland hevur víst aftur, at russiskir hermenn hava gjørt av við sivilfólk, men í gjár kundi amerikanska blaðið, New York Times, avdúka, at fylgisveinamyndir avdúkaðu, at russiskir hermenn skutu ein mann, sum var á súklu.

Eisini Kina er farið at ivast í tíðindunum úr Moskva, og hevur biðið um kanningar av nógvu málunum í Butja.

Í gjár komu ukrainskir hermenn fram á fleiri lík í býarpartinum, Motyzjyn, sum liggur 35 kilometrar frá Butja, og tað fær heimin at tosa um, at allir ræðuleikarnir verri enn so eru avdúkaðir.

Amerikanski forsetin, Joe Biden, sigur bart út, at Vladimir Putin, forseti, er ein kríksbrotsmaður, og at hann eigur at koma fyri rættin sum slíkur.

Butja - Mynd: Ritzau Scanpix

Soleiðis sær út nógvastaðni í Butja. (Mynd: Ritzau Scanpix)

4.500 russisk brotsverk í Ukraina

Høvuðsákærin í Ukraina, Iryna Venediktova, upplýsir, at myndugleikarnir eru í ferð við at kanna 4.500 russisk brotsverk í Ukraina, sum boð eru komin um, og talið økist hvønn dag, tí áhaldandi koma boð frá fólki um brotsverk av ymsum slag.

Tað skrivar The Guardian.

Serliga eru tað nógvu málini í Butja, har fólk eru avrættað, og í høvuðsstaðnum, Kyiv, har fólk nú verða latin leys, sum hava verið í russiskum varðhaldi, og eru illa viðfarin.

- Ákærar eru í ferð við at kanna tey nógvu málini, sum skulu skrásetast, og so skal støða takast til, hvørji mál skulu koma fyri rættin í Ukraina, og hvørji mál skulu fyri altjóða dómstólin í Haag, sigur Iryna Venedoktova við bretska blaðið.

Bardagar í Mariupol
Bretska fregnartænastan boðar í morgun frá hørðum og ógvusligum bardøgum í havnarbýnum Mariupol.

Sambært fregnartænastuni eru umleið 160.000 sivilfólk framvegis í býnum, og tey hava hvørki ljós, hita, vatn ella heilivág, og tey kunnu ikki samskifta við nakran, skrivar bretska fregnartænastan.

Lagt verður aftrat, at russisku deildirnar hava forðað hjálparfólki í at nærkast býnum, sum Russland vil hava valdið á.