Óvist um Biden fer á vitjan í Ukraina

Amerikanski forsetin, Joe Biden, sigur seg ikki vita, um hann fer á vitjan í Ukraina.

Útsøgnin kemur í kjalarvørrinum av, at ukrainski forsetin, Volodimir Zelenskij, hevur heitt á hann um at vitja krígsherjaða landið og høvuðsstaðin, Kiyv.

- Sannleikin er, at tað veit eg ikki, sigur Biden.

ST má taka um endan

Amerikanska sendikvinnan í ST, Linda Thomas-Greenfield, mælir sameindu tjóða til at herða aftursvarið á ta stóru flóttafólkakreppuna, sum russar hava skapt við krígnum í Ukraina.

- Vit vita, at heimurin skeitir eftir ST og hugsar, hvat mótsvarið eigur at vera til samvitskuleysu atgerðirnar hjá russum, sigur hon sambært CNN.

- Lat okkum vísa heiminum, at tá Russland elvdi til ringastu flóttafólkakreppuna í Evropa síðani annan heimsbardaga, tók ST um endan og hjálpti teimum, sum høvdu størsta tørvin, sigur amerikanska sendikvinnan í ST.

Nýggj deyðstøl úr Kharkiv

Ukrainskir myndugleikar siga frá nýggjum deyðstølum í næststørsta býnum í Ukraina, Kharkiv.

Samæbrt tíðindastovuni, AFP, hava minst trý fólk latið lív og 21 særd í russikum álopum á býin.

Upplýsingarnar koma dagin eftir, at fimm fólk lótu lív í líknandi bumbuálopum móti Kharkiv, sum liggur tætt við russiska markið.