Avlopskrav tvingar Rúsuna at selja meira

Landsstýrið tvingar við sínum avlopskravi Rúsdrekkasøluna til at selja enn meira.

Tað tvingar hana til dømis at flyta inn nógv bíligt sterkt øl, sum føroysk bryggjarí ikki kunnu kappast við.

Tað sigur ein minniluti í Vinnunevndini, Javnaðarflokkurin og Tjóðveldi.

Tey heita á landsstýrismannin um at endurskoða rúsdrekkalógina, millum annað so hon kann gerast smidligari fyri matstovur og skeinkistøð.

Fekk bara eina atkvøðu

Vinnunevndin viðgjørdi eitt uppskot hjá Framsókn um at loyva handlum, matstovum og skeinkistøðum at innflyta og selja vín og øl.

Eisini samgonguumboðini í Vinnunevndini helda, at onnur enn Rúsdrekkasølan eiga at sleppa at innflyta rúsdrekka.

Bara Bjarni Kárason Petersen í Framsókn tók undir við uppskotinum, sum bara fekk eina atkvøðu á tingfundinum í gjár.

Landsstýrið kannar, um rúsdrekkalógin skal broytast, millum annað viðvíkjandi kravinum um avlop.