Nú ber til at søkja um miðlastuðul til verkætlanir

Nú ber til á fyrsta sinni at søkja um miðlastuðul til verkætlanir, eitt nú til greinarøð, heimildarsending, poddvarp o.a., ið tíðindamiðlar framleiða við journalistiskari dygd og samfelagsligum virði.

Tað er Uttanríkis- og mentamálaráðið, sum umsitur pengarnar, og sum skal hava umsóknirnar.

Á heimasíðuni skrivar ráðið, á fíggjarlógini eru tvær mió. kr. settar av til miðlastuðulin. Av teimum verða 70 %, svarandi til 1,4 mió. kr., brúktar til verkætlanarstuðul, og 30 %, svarandi til  600 tús. kr., verða brúktar til rakstrarstuðul, grundað á skjalprógvaðar lønarútreiðslur. Lýst verður við seinna stuðulsmøguleikanum í heyst.

Freistin 23. mai

Freistin at søkja verkætlanarstuðul er 23. mai á middegi.

Allar umsóknir skulu skrivast á serstakt umsóknarblað til verkætlanir, sum liggur á heimasíðuni hjá  Uttanríkis- og mentamálaráðnum.

Sambært lógini er tað Miðlastuðulsnevndin, ið tekur endaliga avgerð um miðlastuðul.