Hellutangi ongar avleiðingar fyri havumhvørvið

Fóðurflakin Hellutangi fer ikki at hava serligar avleiðingar fyri havumhvørvið. 

Lítil ella eingin olja ella onnur dálkandi evni vóru umborð, tá Hellutangi fór á land á Víkum 5.apríl í fjør.

Hellutangi er heldur ikki til ampa fyri fiskiskap og skipaferðslu. 

Tað sigur Magnus Rasmussen, landsstýrismaður, í svari til Hervør Pálsdóttur, løgtingskvinnu.

Eingin tíðarfreist

Hann sigur, at partafelagið Luna og Umhvørvisstovan fara at tosa um Hellutanga í næstum. 

Í løtuni eru ongar ætlanir um at seta eina tíðarfreist fyri at fáa vrakið av Hellutanga tikið upp.

Umhvørvisstovan veit ikki, um kannað er, hvørji árin, óhappið á Víkum hevur, sigur Magnus Rasmussen.

Hann sigur, at í løtuni eru ongar ítøkiligar ætlanir um at friða økið á Víkum ella at lýsa tað sum tjóðgarð.