Stálverkið í russiskar hendur

Russland sigur seg nú hava fult tamarhald á Azovstal stálverkinum í Mariupol.

Sambært russiska verjumálaráðnum hava síðstu ukrainsku herfólkini, sum høvdu víðgirt seg á stálverkinum, givið seg yvir í gjárkvøldið.

Í alt hava fleiri enn 2400 ukrainskir hermen givið seg yvir til russiska herin síðani mánadagin, skrivar The Guardian.

Ukrainskir myndugleikar hava ikki váttað tíðindini úr Russlandi, men The Guardian, og aðrir miðlar skriva, at ukrainski forsetin hevur givið herfólkunum, sum eftir eru, boð um, at sleppa sær út og bjarga sær lívinum.

Yvirmaðurin fyri ukrainsku deildirnar á stálverkinum, Denys Prokopenko, segði eisini á sosiala miðlinum Telegram í gjár, at tað nú bert vóru tey deyðu eftir á stálverkinum, og at leiðslan í landinum hevði givið teimum boð um at gevast við at verja býin. 

Talsmaðurin fyri russisku stjórnina, Dmiytry Peskov, sigur, sambært The Guardian, at herfólkini eru tikin sambært altjóða lóg um krígsfangar, og vera viðfarin sambært Genevsáttmálanum, hóast nakrir høgtstandandi russiskir politikkarar hava mælt til at draga ukrainsku herfólkini fyri rættin, og onkur enntá hevur mælt til at avrætta tey.
 

Stálverkið er um 10 ferkilometrar stórt og hevur fleiri enn 24 kilometrar av tunlum og bumbuskýlum undir sjálvari verksmiðjuni.