Danmark tekur ikki undir við minstuløn

ES-tingið hevur samtykt, at minstaløn skal galda í ES. Men tað tekur Danmark ikki undir við.

Tað sigur danski ráðharrin í arbeiðsmarknaðarmálum, Peter Hummelgaard, eftir at hann var á ráðharrafundií Brússel í gjár.

Samtyktin í ES verður framvegis umrødd. Stjórnin umrøður støðuna við partarnar á arbeiðsmarknaðinum, samstundis sum ætlanin verður kannað til botns.

- Vit hava frá byrjan gjørt vart við, at tað er skeivt at lóggeva um minstuløn, tí í Danmark, og eisini í Svøríki, er galdandi, at semjur verða gjørdar, sigur Peter Hummelgaard við Ritzau.

Hann leggur aftrat, at danska stjórnin er í iva um, hvussu orðingin í samtyktini skal tulkast, og hvat úrslitið verður, um ES-dómstólurin skal tulka orðingina.

Danski arbeiðsmálaráðharrin sigur, at samtyktin í ES fær lítla ávirkan á viðurskiftini í Danmark, men stjórnin hevur ta áskoðan, at tað skulu vera partarnir á arbeiðsmarknaðinum, sum skulu samráðast um lønina í Danmark, og ikki ES.