Merkið tekur seg fram á listanum

Reiðarafelagið fyri handilsskip fegnast um, at Føroyar taka seg fram á hvíta lista hjá evropeiska felagsskapinum fyri sjóvinnufyrisitingar, Paris MoU.

Sjóvinnustýrið boðaði í farnu viku frá, at Føroyar er nr. 28 á listanum yvir flaggstatir hjá Paris MoU.

Seinastu tvær ferðirnar, listin er komin út, hevur føroyska flaggið ligið á 31. plássi. Undan hesum lógu Føroyar á 39. plássi.

Fyri at avgera plássið á listanum verður hugt at, hvussu ofta føroysk skip eru kannað og hildin aftur í havnastatseftirliti í Evropa seinastu trý árini. 

Um flaggið ikki er á hvíta lista, verður truplari at fáa avtalur fyri skipini.

Reiðarafelagið fyri handilsskip sigur, at tað fegnast um nýggja plássið á listanum, tí hetta hevur týdning fyri kappingarførið hjá føroyskum reiðaríum.