IRF dyrkar sítt egna grønmeti

IRF á Hagaleiti er farið undir at dyrka sítt egna grønmeti. Í apríl varð skipað fyri plantuskeiði fyri starvsfólkum, og nú ber til at eta burtur av tí, ið fæst burtur úr gróðrarmikla kálgarðinum uttan fyri skrivstovuna á Hagaleiti.

Í kálgarðinum hjá IRF veksur millum annað iceberg-salat, rukola-salat, tomatir, purrleykur, dild og chili, skrivar interkommunali renovatiónsfelagsskapurin á heimasíðuni.

Allar matleivdirnar frá skrivstovuni hjá IRF á Hagaleiti fara í bokashi-kompostspannir, og moldin, ið fæst burturúr, er rík í føðsluevnum. IRF vil við átakinum vísa á týdningin av endurnýtslu.

IRF er ein interkommunalur renovatiónsfelagsskapur, sum allar kommunur í Føroyum, undantikið Tórshavnar kommuna, eiga og reka í felag.