Fleiri vilja taka yvir eftir Boris

Nú eru 10 konservativir politikarar í Bretlandi, sum vilja standa á odda fyri konservativa flokkinum og taka við sum forsætisráðharri eftir Boris Johnson.

Tann tíggjundi í røðini er Liz Truss, uttanríkisráðharri, sum nú eisini ætlar at gerast forsætisráðharri. Tað segði hon við blaðið The Telegraph í gjárkvøldið.

Truss lovar at lækka skattin frá fyrsta degi, og hon sigur, at tíðin er komin til at venda aftur til góðu konservativu virðini.

Nú verður umrøtt, um Boris Johnson skal sita til landsfundin hjá Konservativa flokkinum í oktober, ella um hann skal frá sum skjótast, sigur Tinne Hjersing Knudsen, tíðindafólk hjá DR.

Spurningurin er, um Boris Johnson skal leggja frá sær, áðrenn parlamentið fer i summarfrí, ella um hann skal verða sitandi í summar.