Símun Jóannesarson Hansen formaður í Kringvarpsstýrinum

Jenis av Rana, landsstýrismaður í uttanríkis- og mentamálum, hevur sett Símun Jóannesarson Hansen sum formann í stýrið fyri Kringvarp Føroya, eftir at Elin Winther Poulsen fór frá fyri at vera journalistur í Kringvarpinum.

Tað boðar Uttanríkis- og mentamálaráðið frá í tíðindaskrivi.

Nýggi formaðurin er fyribils settur restina av hesum setanarskeiðinum, sum endar við árslok.

Símun Jóannesarson Hansen er 50 ára gamal, býr í Saltangará og starvast sum fulltrúi í Almannamálaráðnum. 

Hann er útbúgvin løgfrøðingur frá Lærda Háskúlanum í Keypmannahavn, umframt innan marknaðarføring og vørumenning á Eksportskúlanum í Herning.

Símun Jóannesarson er ikki ókunnigur við kringvarpsarbeiðið, tí hann hevur gjørt tónleikasendingar í Kringvarpinum við jøvnum millumbilum síðan 1991.