Nú verður ikki neyðugt at flyta klokkuna

Uppskotið um at hava somu klokkutíð alt árið í Føroyum, er sent til hoyringar.

Bárður á Steig Nielsen, løgmaður, sum eigur uppskotið, sigur í viðmerkingunum til tað, at vit nú fáa ein eyka tíma av dagsljósi seinnapart um veturin, og somu klokkutíð sum Evropa helvtina av árinum. 

Við uppskotinum skulu vit í Føroyum ikki longur flyta klokkuna tvær ferðir um árið, men fáa í staðin summartíð (UTC+1) alt árið.

Tíðin farin

- Tíðin er farin frá at flyta klokkuna. Fleiri fyrimunir eru við at fara til varandi summartíð, millum annað ljósari seinnapartar um veturin. Nú er uppskotið sent til almenna hoyring, og eg vóni at fleiri fara at nýta høvi til at koma við viðmerkingum, soleiðis at vit fáa eitt gott kjak um uppskotið, sigur Bárður á Steig Nielsen, løgmaður.

Uppskotið løgtingslóg um klokkutíð liggur til almenna hoyring inni á ummælisportalinum hjá landsstýrinum, har øll hava møguleika fyri at gera viðmerkingar. Hoyringsfreistin er 7. november 2022.

Sí uppskotið her.