Ango kemur fyri Ango í dag

Klokkan eitt seinnapartin kemur nýggja uppsjóvarskipið Ango á Vág.

Ango kemur í staðin fyri gamla Ango, hjá smápartafelagnum av sama navni. 

Nýggi Ango æt frammanundan Hoffell, og varð í summar keyptur frá reiðarínum Asbjørn í Hirtshals til Føroya. Í sama viðfangi varð gamli Ango seldur aftur til reiðaríið Asbjørn.

Bygdur í 1999

Nýggi Ango er bygdur í 1999. Og sambært reiðarínum er talan um eitt væl betri skip enn gamli Ango, sum reiðaríið átti í eitt lítið ár. Tað skipið er gamla Nýborg, sum áður hevur verið heimahoyrandi í Vági.

Smápartafelagið Ango var eitt av tveimum feløgum, sum í fjørheyst fingu útlutað uppsjóvarkvotur til verkætlanir, sum snúgva seg um ítøkilig skipakeyp. Hitt felagið var smápartafelagið Gráastein í Havn. 

Feløgini fingu tá 3000 tons av makrelkvotu, góð 4000 tons av norðhavssild og 9500 tons av svartkjaftakvotu í part. 

Sambært Suðurrás verður móttøka fyri nýggja Ango við djúphavnina í Vági klokkan 13 seinnapartin.