Mette var toppskorari

Tað vóru kendir politikarar, sum fingu flestar atkvøður á fólkatingsvalinum týsdagin.

Mette Frederiksen, forsætisráðharri, fekk nógv flestar, tilsamans 60.837 atkvøður.

Henni á baki kom Inger Støjberg úr Danmarksdemokratunum, sum fekk 47.211 atkvøður, og síðani Lars Løkke Rasmusen í Moderaterne, sum fekk 38.439 atkvøður.

Tað vísti fínteljingin, sum var í gjár.

Bæði Inger Støjberg og Lars Løkke Rasmussen eru fyrrverandi tinglimir hjá Vinstraflokkinum, og bæði stovnaðu nýggjan flokk í summar.

Inger Støjberg - Mynd: Ritzau Scanpix

Inger Støjberg fekk 47.211 atkvøður.

Lars Løkke Rasmussen - Mynd: Ritzau Scanpix

Lars Løkke Rasmussen fekk triðflestar atkvøður, 38.439.

Samráðingar byrja í morgin 

Mette Frederiksen boðaði í gjár frá, at samráðingarnar um nýggja stjórn byrja í morgin.

Hon ætlar at tosa við flokkarnar eftir stødd, og fyrstur á skránni verður Vinstri, sum er næststørsti flokkur.

Mette Frederiksen fer at tosa við teir 12 flokkarnar, sum hava umboð í fólkatinginum, og við umboðini úr Føroyum og Grønlandi.

Mette Frederiksen fær undirtøku frá trimum av teimum fýra umboðunum úr Føroyum og Grønlandi.