Vit fáa eina bráðfeingis fíggjarlóg

Tá løgmaður í gjár skrivaði út nýval, gjørdist landsstýrið til eitt fyribilsstýri. Hetta merkir, at landsstýrisfólk hava heimild til at virka eins og vanligt, men vanligt er, at bert bráðfeingislógir verða samtyktar.

Nógv stórmál hjá samgonguni eru í tinginum í løtuni og bíða eftir at verða samtykt

Tað størsta av hesum málum er helst uppskotið um fíggjarlóg fyri 2023.

Bárður á Steig Nielsen, løgmaður, sigur, at tað er nærum ógjørligt at fáa eina veruliga fíggjarlóg samtykta nú. Tí verður talan um eina bráðfeingis fíggjarlóg:

Onnur mál, sum samgongan hevur lagt fram, men sum ikki eru liðugt avgreidd og tískil helst detta burtur, eru hesi:

Uppskotið um at leingja frítøkuna fyri meirvirðisgjald og virðisgjald hjá teimum, sum keypa elakfør ella vetnisakfør. Frítøkan skuldi leingjast, men fer nú úr gildi 1. januar 2023.

Uppskotið um at broyta tøkugjaldið hjá alivinnuni, umframt uppskotið um at yvirtaka farsóttarmálsøkið.

Uppskotið um at geva kommunum loyvi til at geva foreldrum pengar fyri at ansa børnunum í staðin fyri at senda tey í vøggustovu, var á veg í løgtingið og er til hoyringar í løtuni.

Uppskotið um at hava summartíð alt árið var eisini á veg í løgtingið. Har er hoyringarfreistin farin.

Barsilsgjald og skattalætti

Uppskotið um broytingar í inngjaldinum og útgjaldinum hjá Barsilsskipanini dettur helst eisini burtur. 1. januar 2023 skuldi hámarksupphæddin annars hækka úr 25.000 krónum upp í 27.000 krónur. Og uppskotið hjá samgonguni um at geva skattalætta og at hækka barnafrádráttin fær helst somu lagnu.

- Tað er spell, at summi av hesum málunum ikki vórðu samtykt, áðrenn nýval varð útskrivað  í gjár. Tað hevði verið ein kærkomin hjálp hjá sperdum barnafamiljum, sigur Bárður á Steig Nielsen. Men tað er ikki ov seint, tí tingið kemur saman aftur í næstum: