Sjóvar kommuna: Almenna byggisamtyktin samtykt

Almenna byggisamtyktin í Sjóvar kommunu er nú samtykt.

Kommunan sendi í desember í fjør Umhvørvis- og vinnumálaráðnum uppskot um broytingar í almennu byggisamtyktini fyri Sjóvar kommunu til góðkenningar.

Uppskotið, ið snúði seg um at dagføra alla byggisamtyktina fyri kommununa, lá frammi til viðmerkingar frá 2. til 23. juni 2021.

Tá ið freistin at koma við møguligum mótmælum ella broytingaruppskotum var farin, hevði kommunan fingið 10 mótmæli og viðmerkingar. 

Hesi vóru síðani viðgjørd í kommunustýrinum, har nøkur fingu viðhald, meðan onnur ikki fingu viðhald.

Býarskipanarnevdin hevur havt málið til viðgerðar, og nevndin hevur viðmælt ætlaðu broytingarnar.

Umhvørvis- og vinnumálaráðið hevur síðani viðgjørt málið, og ráðið tekur undir við viðmælinum frá býarskipanarnevndini, og hevur nú við heimild í  grein 4 í býarskipanarlógini góðkent broytingarnar.