30 ára gamalt vegarbeiði tikið uppaftur

Eitt vegarbeiði, sum byrjaði í áttatiárunum, men steðgaði, tá kreppan kom í 1992, verður nú, 30 ár seinni, tikið upp aftur.

Talan er um Stangavegin í Klaksvík.

Fyri nøkrum árum síðani samtykti Klaksvíkar býráð, at nú skal vegurin gerast liðugur.

Býráðið hevur síðani sett pening av til arbeiðið. 

Breiðka vegin

Í ár verða fýra milliónir brúktar til at breiðka vegin og gera gongubreyt.

Næsta ár eru tríggjar milliónir settar av til parkeringspláss norðan fyri Garðabrekkuna.

Kommunan hevur keypt eini sethús, sum skulu takast niður fyri at flyta Garðabrekkuna longur norður, so hon ikki gerst so brøtt. 

Hendan ætlanin varð samtykt í býráðnum longu fyrst í áttatiárunum.

Hon er síðani tikin fram aftur og samtykt av nýggjum.