Samráðast við Tjóðveldi í dag

Nú klokkan níggju fara Javnaðarflokkurin, Tjóðveldi og Framsókn at samráðast um nýtt landsstýri.

Tjóðveldi er boðsent til samráðingar, eftir at samráðingarnar millum Javnaðarflokkin, Sambandsflokkin og Framsókn slitnaðu í gjárkvøldið.

Tað var spurningurin um at skerja ríkisveitingina, sum gjørdi, at samráðingarnar slitnaðu. Sum skilst var so mikið langt millum Sambandsflokkin og Framsókn í hesum spurninginum, at Framsókn avgjørdi at taka seg úr samráðingunum.

Høgni Hoydal, 16:9

Høgni Hoydal, formaður í Tjóðveldi, fekk fundarboð frá samráðingarleiðaranum í gjárkvøldið. (Mynd: Bjarni Árting Rubeksen)

Aksel V. Johannesen, samráðingarleiðari, staðfesti um sjey tíðina í gjárkvøldið, at samráðingarnar bóru ikki á mál, og at hann fór at senda boð eftir Tjóðveldi.

Og nú klokkan níggju verður fyrsti samráðingarfundurin millum Javnaðarflokkin, Tjóðveldi og Framsókn.