Nevna ikki Ukraina í boðunum til russar

Ukraina er ikki nevnt í fráboðanini frá grønlendska fiskimálaráðnum til Russlands um, at Grønland ikki vil hava fiskiveiðuavtalu við Russland næsta ár.

Sagt verður bara, at nakrir fiskastovnar eru vorðnir minni, og tí kann Grønland ikki lata nakað næsta ár.

Men landsstýrisformaðurin, Mute Egede, hevur fyrr sagt, at Grønland ger í øllum sum ES, tá talan er um revsiatgerðir móti Russlandi og russiskum fyritøkum.

Ikki síðani 1992

Hetta er annars fyrstu ferð síðani 1992, tá Grønland gjørdi fiskiveiðuavtalu við Russland, at Grønland ikki vil gera nýggja avtalu. 

Russland bjóðaði Grønlandi til talgildar samráðingar um 2023. 

Væntað var, at Grønland hevði fingið 3.000 tons av toski og hýsu í Barentshavinum.

Og Russland hevði fingið svartkalva og kongafisk frá Grønlandi.