Ógvusligt loftálop á Ukraina

Russland hevur í morgun framt álop við robott-rakettum móti fleiri økjum í Ukraina. 

Oleksij Arestovytj, sum er ráðgevi hjá forsetaskrivsstovuni í Ukraina, skrivar á Facebook, at meira enn 100 robott-rakettir eru skotnir í fleiri bylgjum. 

Borgarstjórin í Kyiv, Vitali Klitschko, sigur við The Guardian, at streymurin er farin í umleið 40% av býnum eftir umfatandi loftálopið. 

Boðað verður frá spreingingum í m.a. Kyiv, Kharkiv, Odessa og Zhytomyr-landspørtunum.

Fleiri spreingingar hoyrdust eisini í Lviv har vesturi í Ukraina, sigur borgarstjórin.

Myndugleikar í fleiri landspørtum siga, at ukrainska verjan hevur skotið niður fleiri av robottunum.