Vestmannatunnilin kostar hálva milliard

Ein tunnil millum Vestmanna og Kvívík hevði kostað um eina hálva milliard krónur, um farið verður í gongd við hann nú. 

Tað hevur Landsverk upplýst á einum kunnandi fundi, sum var fyri Vestmanna og Kvívíkar kommunu fyri jól. 

Ætlanin við fundinum var at kunna um gongdina at fyrireika ein komandi Vestmannatunnil.

Nýggj linjuføring

Á fundinum varð upplýst, at í sambandi við at arbeiðið við tunlinum er tikið uppaftur, hevur Landsverk teknað eina nýggja linjuføring, har tunnilin kemur út fram við verandi landsvegi. Í ætlanunum frá 2019 kom tunnilin út á havnarlagnum í Vestmanna. 

Nýggja linjuføringin hevur verið grundarlag undir nýggjum jarðfrøðiligum kanningum, men tær eru ikki lidnar enn.

Miðað verður eftir at gera seinastu royndarboringina fyrst í hesum árinum.