Allir fangar sleppa ikki við á útferð

Fólk, sum ikki eru mett at egnað at vera í opnum fongsli, eiga ikki at sleppa við á útferðunum hjá Varðhaldinum í Mjørkadali. 

Danska løgmálaráðið sigur, eftir kunning frá Kriminalforsorgini, at ikki allar útferðir hjá Varðhaldinum í Mjørkadali eru loyvdar.

Hesar eru tí steðgaðar. Nakrir fangar sleppa ikki við longur.

Heimild er ikki fyri øllum útferðunum, sum Varðhaldið hevur skipað fyri síðani 2011, sigur Kriminalforsorgin.

Samsvarar ikki við galdandi reglur

Føroyanevndin hjá fólkatinginum og landsstýrið hava fingið bræv frá Løgmálaráðnum um hetta.

Løgmálaráðið sigur, at millum annað útferðir í náttúruna ikki samsvara við galdandi reglur. 

Slíkar útferðir eru ikki loyvdar í Danmark.

Umboðsmaðurin hjá fólkatinginum hevur sagt við Kriminalforsorgina, at fyritreytin er, at reglurnar, sum eru í Føroyum, eiga í størstan mun at vera sum tær í reglunum um revsing í Danmark.

Hetta hóast lógin um revsingarfullgerð, um straffuldbyrdelse, ikki er sett í gildi í Føroyum.  

Sambært Kriminalforsorgini eiga somu reglur at vera fyri Varðhaldið í Mjørkadali sum fyri opin fongsul í Danmark.

Hava ikki gjørt mun á fangum

Varðhaldið hevur í sambandi við útferðir ikki gjørt mun á teimum, sum høvdu kunnað verið í opnum fongsli, og hinum fangunum.

Tey, sum ikki eru mett at vera egnað til opin fongsul, sleppa tí ikki longur við, tá Varðhaldið ger útferðir.

Talan er um fá fólk, sigur Kriminalforsorgin, sum eru í Mjørkadali til tey kunnu flytast í afturlatnan stovn ella í afturlatið fongsul í Danmark. 

Men málið verður viðgjørt saman við landsstýrinum, stendur í brævinum hjá Løgmálaráðnum.    

Ein lóg um revsingarfullgerð er á veg í Føroyum.