Tvey øki í Sandavági til íbúðabygging

Tað tykist sum fleiri kommunur í landinum nú veruliga hava sett ferð á at byggja íbúðir.

Seinastu mánaðirnar hava vit frætt um fleiri størri kommunal grundstykkir, sum eru lýst til sølu til tey, sum vilja átaka sær at byggja íbúðir, og í dag er tað Vága kommuna, sum er komin við slíkari fráboðan.

Talan er um tvey økir í Sandavági. Annað er 1.300 fermetrar til støddar, og hitt er 2.000 fermetrar.

Hóskandi tal ein treyt

Tað er ein treyt, ateitt hóskandi tal av íbúðum er í verkætlanini. Tað er ein fyrimunur, um byggingin er fjølbroytt við ymiskum íbúðastøddum, og at atlit verður tikið at umhvørvinum og útsýninum.

Dentur verður lagdur á, at byggingin tekur seg væl út, er dygdargóð og fellur væl inn í lendið, sigur Vága kommuna.

Bjóðast kann uppá økini hvør sær ella undir einum. Prísurin er kr. 200,- fyri fermeturin. Økið liggur við innkomuvegin til bústaðarøkið Sarpar í Sandavági, við góðum útsýni yvir bygdina og út á fjørðin.

Freistin at lata inn skrivlig boð er fríggjadagin 20. januar á middegi.