Biden kemur við fráboðan um Ukraina í dag

Amerikanski forsetin, Joe Biden, kemur í dag við eini fráboðan um Ukraina. Hetta verður helst seint seinnapartin.

Tað upplýsa Hvítu húsini.

Evnið verður helst at útflýggja av stríðvognar.

Fráboðanin kemur, eftir at týskir myndugleikar fyrr í dag boðaðu frá, at teir heimila, at týskt-framleiddir Leopard 2-stríðsvognar kunnu sendast Ukraina, og at Týskland sjálvt eisini fer lata Ukraina 14 máttmiklar stríðvognar úr síni goymslu.

Ætlanin hjá Týsklandi er at senda nærum 100 stríðsvognar til Ukraina.

Leopard-stríðsvognur, stríðsvognur, Leopard

Týskland fer væntandi at senda 100 stríðsvognar til Ukraina. (Mynd: Ritzau Scanpix)

Vreiði í Russlandi

Tíðindini um týsku avgerðina elva til vreiði í Russlandi.

- Henda sera vandamikla avgerðin lyftir ósemjuna upp á nýtt stig, og er púrasta í stríð við tað, sum týskir politikarar hava sagt, um at Týskland ikki vil dragast inn í kríggið, sigur sendiharrin hjá Russlandi í Týsklandi, Sergej Netsjajev, í fráboðan.

Amerikanskir miðlar siga, at amerikanski myndugleikar í alt størri mun nú taka undir við at senda Ukraina Abrams-stríðvognar. 

Bretland og Pólland, sum fara at senda Ukraina 14 stríðsvognar hvør, fegnast um týsku avgerðina.

Fleiri lond kunnu senda hjálp

Holland og Spania siga, at tey eru til reiðar at senda stríðsvognar, um Ukraina hevur tørv á tí. Hinvegin hevur Frakland fyribils lovað at senda eitt minni slag av stríðsvognum til Ukraina.

Nú Týskland hevur givið londum samtykki um, at stríðsvognar, sum eru framleiddir í Týsklandi, kunnu sendast til Ukraina,  kann tað møguliga fáa fleiri lond at veita Ukraina hjálp.

Spanski verjumálaráðharrin, Margarita Robles, sigur í sponskum sjónvarpi, at tey umhugsa at senda Leopard 2-stríðsvognar, og at veita upplæring, og hvussu stríðsvognarnir skulu haldast.