Landsstýrismaður fer í barsilsfarloyvi

Bjarni Kárason Petersen, landsstýrismaður í lógarmálum, fer í barnsburðarfarloyvi frá 1. februar og í átta vikur, upplýsir Løgmansskrivstovan.

Hetta er fyrstu ferð, at ein landsstýrismaður ella landsstýriskvinna fer í barsilsfarloyvi.

Serstøk tíð

"Fyrsta tíðin saman við barninum er serstøk. Vit pápar eiga eisini hesa tíðina, men duga kanska ikki so væl at raðfesta hana. Tað er ein tíð, ið mann ikki fær aftur, og er tískil dýrabar, og ta tíðina ynski eg at raðfesta, og njóta til fulnar. Eg vóni at fleiri pápar fara at síggja virði í at fara í barsil í framtíðini, óansæð um man er landsstýrismaður, handverkari ella lærari.”, sigur Bjarni Kárason Petersen, landsstýrismaður í lógarmálum, í tíðindaskrivi.

Meðan Bjarni Kárason Petersen er í barsil, røkir løgmaður málsøkini hjá honum í landsstýrinum.