Heilsuverkið skal hava nýggja talgilda skipan

Stýrisbólkur er settur at finna avloysaran til Cosmic, sum er talgilda skipanin í heilsuverkinum.

Turið Arge, aðalstjóri í Heilsumálaráðnum, er forkvinna í stýrisbólkinum.

Hinir limirnir eru Steinar Eirikstoft, forstjóri í Sjúkrahúsverkinum, Hjalti Gunnarstein, landsapotekari, Egil á Bø, stjóri í Heilustrygd, og Eyðun Christiansen, stjóri í Kommunufelagnum. 

Bólkurin var mannaður í fjør og hevur havt yvirskipaðan fund um, hvussu arbeiðið skal leggjast til rættis.

Turið Arge

Turið Arge er forkvinna í stýrisbólkinum, ið skal finna avloysaran fyri Cosmic-heilsuskipanina.

Stór KT-verkætlan

- Vit eru tíðliga í tilgongdini og bíða í løtuni eftir fígging, áðrenn farið verður víðari til  næsta stig. Hetta verður helst ein av størstu KT-verkætlanunum í Føroyum, sigur Steinar Eirikstoft, limur í stýrisbólkinum.  

Næsta stig er at  finna viðkomandi fólk at gera kravfesting, sum skal lýsa tørvin í slíkari skipan. 

Sjúkrahúsverkið hevur gjørt avtalu við svenska Cambio, sum veitir Cosmic-skipanina, um at leingja avtaluna til 2028. Til ta tíð verður skipanin hildin viðlíka, men hon verður ikki ment.