Rør 100.000 metrar fyri Eydnudeildina

Vermund Vestergaard rør í dag 100.000 metrar til frama fyri arbeiðið hjá Eydnudeildini.

Eydnudeildin er hondbóltsvenjing og dystir fyri børn og ung við avbjóðingum.

Tað krevur sítt at rógva langa teinin, og Vermund Vestergaard hevur vant miðvíst seinastu tíðina. Hann roknar við, at rógvingin fer at taka ímillum sjey og átta tímar.

Róð verður á maskinu í hølunum hjá Bilrøkt í Havn.

Vermund Vestergaard legði 'frá landi' klokkan 9.00 í morgun, og ígjøgnum dagin er ymiskt á skránni, m.a. vafflur og kaffi, sum verður borðreitt um middagsleiti, og sangur frá Jens Marna Hansen klokkan 15. Sum skilst ber eisini til at rógva saman við Vermundi Vestergaard part av teininum, um tað liggur fyri.

Harafturat ber til at kappast um góðar vinningar, og sjálvandi at stuðla Eydnudeildini. 

Meir kann frættast á facebook-síðuni hjá Vermundi Vestergaard her.