Stjórnarráð leitar eftir leigumáli

Stjórnarráðið leitar eftir hølum at leiga nærhendis løgtinginum og Tinganesi.

Leigumálið kann vera í bygningi fyri seg ella í parti av bygningi.

Ætlaða leigumálið kann vera í nýggjum, útbygdum ella umvældum bygningi.

Freistin at gera vart við seg er til 9. mars klokkan 14.00.

Stjórnarráðið - ikki verður sagt í útboðnum hjá Landsverki, hvat stjórnarráð, talan er um - hevur í hyggju at flyta, tá verandi leigumál gongur út. 

500-600 fermetrar

Stjórnarráðið vil gera avtalu um nýtt leigumál 1. august, ella skjótast tilber eftir hetta.

Hóskandi stødd á leigumálinum er mett at vera 500 til 600 fermetrar.

Sagt verður, at stjórnarráðið er ein virkin stovnur við nógvum innanhýsis og uttanhýsis samskifti og samstarvi.

Í løtuni eru har eitt landsstýrisfólk og 16 starvsfólk. Pláss má gjarna vera fyri nøkrum starvsfólkum afturat.

Treytin er, at løgtingið játtar pengar til leiguna.