Aðalráð og stovnar halda ikki ásetingar um útbjóðing

Aðalráð og almennir stovnar halda ikki ásetingar í lógum, kunngerðum og rundskrivum um at bjóða út vørur og tænastur og um at tíðaravmarka lønir.

Tað siga løgtingsgrannskoðararnir, nú teir eru komnir við landsroknskapinum fyri 2021 í løgtingið.

Nógvar aðrar atfinningar eru í uppskotinum til samtyktar.

Millum annað vísa løgtingsgrannskoðararnir á, at almennar byggiverkætlanir ikki eru góðkendar ella avhendaðar orsakað av feilum og manglum.

Samskipan millum stovnar er ikki í lagi, millum annað tá altjóða skipaskrásetingin FAS verður umsitin.

Innaneftirlitið hjá nøkrum stovnum er ikki í lagi.

Heldur ikki er fíggjarstýringin av verkætlanini at útbyggja Landssjúkrahúsið í lagi, siga løgtingsgrannskoðararnir.