Danska verjan skal hava nýggj skip

Danska verjan skal gera íløgur í nýggj verjuskip, ið skulu koma í staðin fyri tey fýra gomlu skipini í Thetis-klassanum hjá sjóverjuni.

Tað boðar danski verjumálaráðharrin, Troels Lund Poulsen, frá.

Thetis-klassin er tey skipini, ið millum annað sigla við Grønland og Føroyar. Teirra uppgáva er at verja sjóumveldið hjá Danmark - ella suverænitetshævdelse, sum danir kalla tað.

Troels Lund Poulsen, verjumálaráðharri, 16:9

Troels Lund Poulsen, verjumálaráðharri. (Savnsmynd: Bjarni Árting Rubeksen)

30 ára gomul

Skipini eru 30 ára gomul, og tey kunnu ikki longur loysa verjuuppgávurnar, sum Danmark hevur bundið seg til í samstarvinum við Nato. 

Ætlanin hevur verið at umvæla gomlu skipini, men nú hevur Troels Lund Poulsen broytt hugsan.

- Stutta svarið er ja. Enn veit eg ikki, um talan er um fleiri skip, men vit fara at skifta gomlu skipini út, og so mugu vit hyggja nærri at tørvinum. Tað sigur hann við grønlendska kringvarpið KNR.

Støðan í donsku sjóverjuni hevur verður nógv umrødd í Danmark. Millum annað hava somu skip ligið við maskinbreki, so einki danskt verjuskip var nærindis Grønland ella Føroyum

Skipini hava heldur ikki kunnað brúkt kanónirnar í fleiri ár.