Happing orsøk til skjóting í finskum skúla

Finska løgreglan hevur í dag boðað frá, at 12 ára gamli skúlanæmingurin, sum í gjár skeyt frá hond í einum skúla í Vantaa, hevur sagt, at hann varð happaður

Finnland syrgir sorgarleikin í gjár, tá ein 12 ára gamla drongur byrjaði at skjóta frá hond í einum skúla og drap ein annan 12 ára gamlan drong

Mynd: Ritzau / Scanpix

Sigrún H. Brend

03.04.2024 - 18:39

"Orsøkin til hendingina vísti seg at vera happing."

Hetta skrivar finska løgreglan í tíðindaskrivi í dag.

"12 ára gamli skúlanæmingurin, sum illgruni er til, hevur í avhoyring sagt, at hann var happaður, og upplýsingarnar eru eisini váttaðar í undankanningum, sum løgreglan gjørdi."

Skottilburður, Finnland, skúlaskjóting

12 ára gamli næmingurin, ið skeyt frá hond, byrjaði í skúlanum tíðliga í ár.

Sosialir myndugleikar taka sær nú av dronginum.

"Kanningarnar vísa fyribils, at 12 ára gamli næmingurin, tá ið hann fór úr skúlanum í gjár, hótti næmingar, sum vóru á veg í skúlan í býarpartinum Siltamäki í Helsinki, við eini skammbyrsu," skrivar løgreglan, sum kannar málið sum ólóglig hóttan.

Ein 12 ára gamal drongur lat lív í skottilburðinum, og tvær 12 ára gamlar gentur, sum fingu álvarsligar løstir, liggja framvegis á sjúkrahúsi.

Vápnið, sum var nýtt undir skottilburðinum, átti ein í familjuni hjá 12 ára gamla næminginum, segði løgreglan á tíðindafundi í gjár.