42 fleiri húski í Føroyum nú enn í februar

Økingin í fólkatalinum í Føroyum sæst eisini aftur í talinum av húskum í landinum. 

Fyrst í mars vóru 19.347 húski í Føroyum, vísa tøl hjá Hagstovuni. 

Hetta eru 42 húski fleiri enn í februar mánaði, og síðani mars í fjør eru húskini nú 331 fleiri í tali.

Flestu húskini eru í Suðurstreymoy, tey eru 8.124.

Framvegis eru húskini, har bara vaksin búgva, tey flestu.

Størsti bólkurin er húski við einum vaksnum. Næststørsti bólkur eru húski við tveimum vaksnum og triðjstørsti bólkur eru húski við trimum ella fleiri vaksnum. 

Fjórðstørsti bólkurin eru so húski við tveimum vaksnum og einum barni millum null og fimm ára aldur, og vóru tey í mars tilsamans 2.082 í tali.

Sum húski verða roknaðir persónar, ið hava sama skrásetta bústað í landsfólkaskránni, og sum vaksin verða roknaðir persónar, ið eru 18 ár og eldri.