Ársfrágreiðing 2023 hjá Kringvarpinum er nú tøk

Mótsetningar merktu árið 2023

Øðrumegin hendu frambrot á serliga talgilda økinum, sum millum annað førdu til, at børnini fingu eitt nýtt og nógv betri tilboð. Hinumegin kom óvissan um fíggjarligu karmarnar á hámarkið í vetur. Lyftið í samgonguskjalinum um at styrkja Kringvarpið var ikki framt í verki. Tí boðaði leiðslan í november frá, at neyðugt var at spara yvir 8 milliónir krónur. Umfatandi sparitiltøkini merktu, at starvsfólkahópurin minkaði við útvið 11 ársverkum. Hetta rakti skránna meint. Sum tað fyrsta steðgaðu fyrireikingarnar til stóru sjónvarpsframleiðslurnar av nýggjárskonsertini og ítróttafagnaðinum, sum skuldu vera í januar í 2024. Landsstýriskvinnan í mentamálum boðaði stutt eftir hetta frá einum lógaruppskoti, sum bøtti um inntøkugrundarlagið hjá Kringvarpinum. Uppsagnirnar í fasta starvsfólkahópinum vórðu tí tiknar aftur. Fráboðaða lógaruppskotið fór tó ikki at geva allar tær inntøkurnar, sum tørvur var á, og tí stóðu flestu sparingarnar í rakstrinum og skránni við. 

- Úr formælinum. 

Ársfrágreiðingin er ætlað almenninginum og verður skrivað við støði í teimum skyldum, Kringvarpið hevur sambært public service-sáttmálanum. Virksemið verður lýst í hagtølum fyri ein part, og eisini eru frágreiðingar um sendingar og onnur átøk, sum hava fylt í arbeiðnum undanfarna árið.