Landsliðið situr enn í Føroyum og bíðar

Manslandsliðið í hondbólti, sum skal til Skopje í Norðurmakedonia, slapp ikki avstað, sum ætlað, í gjár.

Fyri mjørka var ikki lendandi í Vágum í gjárkvøldið, og flogfarið, sum skuldi flúgva landsliðsleikarar til Keypmannahavnar, stendur í Íslandi.

Flogfarið hjá Atlantsflogi úr París, fleyg leingi uppiyvir í gjárkvøldið og royndi eisini at lenda. Hugsanin var, at hetta flogfarið skuldi flúgva landsliðið til Billund.

Nú verður bíðað eftir, at flogfarið úr Keflavík lendir í Vágum.

Lendir tað, verður flogið til Keypmannahavnar klokkan 12.20.

- Sleppa vit avstað úr Vágum, eru fleiri ferðamøguleikar at sleppa til Skopje, sigur Andrass Thomsen, stjóri í Hondbóltssambandinum.

Sambært norsku veðurstovuni YR, verður mjørkin liggjandi í Vágum allan dag.

Landsliðið í hondbólti skal spæla seinna HM-undandystin ímóti Norðurmakedonia sunnukvøldið.

Teir vunnu fyrra dystin í Havn mikukvøldið  34-27.