Flogbóltsmenninir taka ímóti Íslandi og Eysturríki í Silvurliguni

Um vikuskiftið spælir føroyska manslandsliðið við monnum tveir landsdystir á heimavølli í evropeisku Silvurliguni, tá Ísland og Eysturríki koma á vitjan.

Dysturin ímóti Íslandi, sum verður í høllin i á Hálsi fríggjakvøldið, kann væntast at gerast javnur og spennandi. Føroyar og Ísland møttust eisini í fyrsta umfarinum, sum var í Íslandi fyri einari viku síðani, og tá vann Ísland dystin 3-1. Føroyar høvdu annars settbólt í fjórða setti, men tað eydnaðist ikki at avgera til 2-2, og Ísland vann í staðin 27-25, skrivar Flogbóltssamband Føroya. 

Sunnudagin kl. 17 spæla Føroyar ímóti Eysturríki, sum er mett at vera væl sterkari enn bæði Ísland og Føroyar.

Kvinnurnar dystast í Luksemborg

Bestu føroysku flogbóltskvinnurnar spæla eisini í Silvurliguni um vikuskiftið. Føroyar spæla í Luksemborg, har tær møta vertunum fríggjadagin. Úrslitini farnu árini benda á, at føroysku kvinnurnar hava góðan møguleika at fáa síni fyrstu stig í ár.

Leygardagin spæla føroysku kvinnurnar seinna dystin í hesum umfarinum. Tann dysturin er ímóti Ungarn, sum verður mett at vera væl sterkari enn Føroyar og Luksemborg.