EM í svimjing: Bartal føroysk met

Bartal E. Eidesgaard úr Havnar Svimjifelag svam seg til nýtt føroyskt met í 50 metra bringusvimjing til EM, sum er í Beograd í Serbia.

Tíðin hjá honum var 29,27 sekund. Róland Toftum átti gamla metið á 29,36 frá Reykjavík International í januar 2023.

21 ára gamli svimjarin úr Havn hevur eisini sett nøkur persónlig met í Beograd, millum annað í 50 metra frísvimjing á langgeil við tíðini 23,85 og í 100 metra frísvimjing á langgeil við tíðini 52,32.

Elisabeth Erlendsdóttir svimur eisini í kappingini, sum endar í dag.