Eingin niðurstøða enn um gamalt endurgjaldskrav

Eitt endurgjaldskrav, sum Fiskimálaráðið fekk frá partafelagnum Northwest Pelagic fyri hálvum fjórða ári síðani, er ikki avgreitt enn.

Kravið er góðar 80 mió. kr. 

Endalig niðurstøða er ikki gjørd, stendur í landsroknskapinum fyri 2023, sum júst er komin.

Partafelagið misti veiðiloyvið í desember í 2016, tí Fiskimálaráðið segði, at útlendski eigaraskapurin í skipi felagsins, Atlantsfarinum, var ov stórur.

Málið endaði í rættinum, sum gav Northwest Pelagic viðhald. Felagið fekk tí veiðiloyvið aftur í mars í 2020.

Men felagið kravdi endurgjald fyri mistan fiskiskap ta tíðina, felagið ikki hevði veiðiloyvi.