70 fráboðanir um koronu farnu vikuna

Heilsustýrið hevur farnu vikuna fingið 70 fráboðanir um koronu.

Tað boðar Heilsustýrið frá í tíðindaskrivi.

Í síðstu viku heitti Heilsustýrið á fólk um at boða frá, um tey høvdu staðfest koronu við eini heimatest.

Grundgevingin fyri at koma við hesi áheitan var, at smittutølini frá Rannsóknarstovuni á Landssjúkrahúsinum ikki vístu nakra smittu við koronu, samstundis sum ógvuliga nógv fólk søgdu seg vera sjúk við koronu. Heilsustýrið vildi tí hava eina hóming av, um hald var í hesum.

Í tíðindaskrivinum seinnapartin sigur Heilsustýrið, at nýggju tølini skulu sjálvsagt takast við stórum fyrivarni. 

- Talið á innkomnum fráboðanum sigur einki um veruligu smittustøðuna í Føroyum í løtuni, men tað gevur ábendingar um eitt ávíst smittutrýst, skrivar Heilsustýrið, sum tí heitir á fólk um at boða stýrinum frá, um tey hava staðfest koronusmittu við eini heimatest.