Bæði kyn geva fleiri møguleikar

Soleiðis sigur nýggja forkvinnan í javnstøðunevndini, Halla Nolsøe Poulsen, sum hevur sitið í sessinum í góðan mánað.

- Um man kann gera mun, so skal man traðka til, sigur Halla um orsøkina til, at hon segði ja til at taka við sessinum, tá fyrrverandi forkvinna fór frá í úrtíð.

Javnstøðunevndin hevur úr at gera, tí nógv eru tey, sum vilja hava ráðgeving um ymiskt, sum hevur við javnstøðu at gera. Tað kann snúgva seg um at fáa betri javnstøðu á einum arbeiðsplássi ella einum ítróttafelag, men tað kann eisini vera javnstøðupolitikkur, ið skal orðast, tí viðskiftafólk úti í heimi krevja hetta av sínum veitarum.

Eisini hevur nevndin til uppgávu at tryggja, at javnstøðulógin verður hildin, og tá tey síggja brot á hesa, gera tey vart við brotið og biðja um at fáa tað rættað. Hetta kann bæði vera ein nevnd, har annað kynið er yvirumboðað ella ein starvslýsing, har lýst verður eftir starvfólki av øðrum kyninum.