Dartlandsliðið: Skulu verja 16. plássið

Føroyska dartlandsliðið er farið til Slovakia, har evropameistaraheitið verður komandi vikuna, skrivar Dartsamband Føroya.

Har skulu føroyingarnir royna at verja 16. plássið, sum tað eydnaðist at fáa, tá EM var í Spania fyri tveimum árum síðan.

Tað eydnaðist ikki at manna eitt lið við kvinnum hesa ferð, og tí luttaka Føroyar bert við mansliði. Teir, sum eru við á liðnum eru Jan Erik Fjallstein, Remy Gaardlykke, Jan MacIntosh og Uni Árting. Venjarin, Jens Albert Simonsen, og formaðurin, Annfinn Hjaltalin, eru eisini við í føroyska ferðalagnum.

Týsdagin er byrjanarhátíð og fundarvirksemi á skránni. Dystir verða mikudagin, hósdagin, fríggjadagin og leygardagin. Spælt verður bæði í einmansleiki, tvímansleiki, umframt liðdystirnar, har fýra leikarar eru á hvørjum liði.

Dartsambandið skrivar, at tað er ilt at meta um, hvussu líkindini eru fyri at fáa eins gott úrslit og seinast hesa ferð. Í liðkappingini eru londini styrkismett, men í einmans- og tvímansleiki er tilvildarligt lutakast, sum kann fáa avgerandi týdning.