Grønlendingar kanska á talvolympiadu næstu ferð

Tá ið OL í talvi verður næstu ferð - í 2026 - er møguleiki fyri, at umboð fyri Grønland vera við undir grønlendskum flaggi, nú grønlendskt talv eisini er altjóða viðurkent.

Tað skrivar grønlendska talvsambandið í tíðindaskrivi, sambært Sermitsiaq.

- Hetta fer at geva telvarum møguleika at menna sínar førleikar, men eisini at styrkja altjóða samstarvið, og gera Grønland sjónligari í altjóða ítróttahøpi, skrivar grønlendska talvsambandið.

Næsta OL í talvi verður í 2026 í Tashkent, sum er høvuðsstaðurin í Usbekistan.