Iran hóttir við at leggja undirstøðukervið í Ísrael í oyði

Iran fer at oyðileggja alt undirstøðukervið í Ísrael, um Ísrael loypur á Iran.

Tað sigur iranska herleiðslan sambært AFP-tíðindastovuni.

Boðini koma eftir, at Iran sendi okkurt um 200 rakettir inn í Ísrael í gjár.

- Bumbuálopini verða endurtikin og herd, og alt undirstøðukervið í landinum verður rakt, segði iranski generalmajorurin, Mohammed Baheri, í almennum sjónvarpi.

Iranskt rakettálop á Ísrael

Fólk í Tel Aviv leitaðu sær skjól, tá ávaringarlúðrarnir boðaðu frá iransku rakettálopunum. (Mynd: Reuters/Ritzau Scanpix)

Stórt mistak

Ísraelski forsætisráðharrin Benjamin Netanyahu segði í gjárkvøldið, at Iran hevur framt eitt stórt mistak við at leypa á Ísrael.

Amerikanski netportalinum Axios skrivar, at Ísrael ætlar at hevna seg inn á Iran.

Netportalurin endurgevur ísraelskar tænastumenn.

Ætlanin er at raka iranska oljuídnaðin og onnur týdningarmikil mál í landinum.