Vilja ikki hava pengar úr statskassanum

Føroyskir politikarar eiga ikki at fáa pengar úr Danmark til politiska upplýsing.

Tað halda triggir flokkar í løgtinginum.

Meirilutin í uttanlandsnevndini, Framsókn, Fólkaflokkurin og Tjóðveldi, heldur tað vera skeivt, at onnur enn vit sjálvi rinda fyri politiska upplýsing í Føroyum.

Uttanlandsnevndin hevur viðgjørt uppskotið um, at flokkar, sum stilla upp til fólkatingsval, og valevni, sum ikki eru í nøkrum flokki, fáa studning úr statskassanum.

Meirilutin sigur, at fólkatingsval gerast alsamt meira óviðkomandi fyri føroyingar. 

Hann sigur eisini, at eftir seinasta fólkatingsval hevði Fólkaflokkurin rætt til 155.770 kr., Sambandsflokkurin 303.585 kr, Javnaðarflokkurin 283.864 kr., Tjóðveldi hevði rætt til 182.521 kr. og Miðflokkurin 45.029 kr. í studningi.

Minnilutin í uttanlandsnevndini, Javnaðarflokkurin, Sambandsflokkurin og Miðflokkurin, vil varðveita skipanina.

Men hann heitir á løgmann um at royna at fáa atkvøðumarkið lækkað, so munur ikki verður gjørdur á flokkunum.

Markið nú er 1.000 atkvøður.