Tríggir av fýra monnum arbeiða í privatu vinnuni

Tríggir av fýra monnum í Føroyum arbeiða í privatu vinnuni. 

Hinvegin arbeiða minni enn 40 prosent av kvinnum hjá privatum arbeiðsgevara. 

Hetta vísa nýggj tøl hjá Hagstovuni. 

Í september arbeiddu um 16.800 starvsfólk, ella 56,6 prosent, hjá privatum arbeiðsgevara. 

Hini 43,4 prosentini, sum eru sløk 12.800 starvsfólk, arbeiða hjá tí almenna. Almennir arbeiðsgevarar fevna um stovnar og almennar fyritøkur.  

Í september vóru 29.584 starvsfólk í Føroyum. Tað eru 231 fleiri samanborið við sama mánað árið fyri. Vøksturin er 0,8 prosent.