Einki ítøkiligt um fjarlestur

Fjarlestur og fjarundirvísing eru við í strategisku ætlanini hjá Fróðskaparsetrinum fyri árini 2025 til 2030.

Væntandi fer Fróðskaparsetrið tí, so ella so, at raðfesta tey.

Meira ítøkiligt er svarið frá Djóna Nolsøe Joensen, landsstýrismanni, ikki, tá Súsanna Bertholdsen, løgtingskvinna, spyr um Fróðskaparsetrið hevur ítøkiligar ætlanir um fjarlestur og fjarundirvísing.

Landsstýrismaðurin sigur eisini, at fyri at røkka málunum um fjarlestur og fjarundirvísing, verður neyðugt at gera íløgur í KT- og samskiftisútgerð og læra undirvísarar nýggjar og hóskandi frálæruhættir.