Eysturkommuna: Triðja hvørt barn er einsamalt eftir skúlan

Triðja hvørt barn í Eysturkommunu er einsamalt heima eftir skúlan, til foreldrini koma heim.

Tað er eitt úrslit í spurnakanning í Eysturkommunu um triðja til 10. flokk.

Úrslitini eru við í tilmæli, sum ein arbeiðsbólkur hevur gjørt til Eysturkommunu um, hvussu tilboð til næmingar í fólkaskúlanum skal skipast.

30 prosent av børnunum eru einsamøll heima eftir skúla, til foreldrini koma heim.

17 prosent ganga ikki til ítrótt ella annað frítíðarvirksemi.

Les tilmælið her.

Eysturkommuna og álit

Forkvinnan í Umhvørvis – og trivnaðarnevndini fær tilmælið handað. (Mynd: Eysturkommuna)

Virkishús og ungdómshús

31 prosent av foreldrunum halda, at útboðið av frítíðartilboðum kundi verið fjølbroyttari og heili 79 prosent av foreldrunum halda, at ov fá frítíðartilboð eru í Eysturkommunu.

Nógv tey flestu vilja hava eitt virkishús og ungdómshús.

Í kanningini sæst, at børnini ikki so ofta sum fyrr fara út at spæla eftir skúlatíð.

Í staðin situr triðja hvørt barn einsamalt heima, til foreldrini koma heim. 

Gongdin stuðlar ikki undir góða sálarheilsu, trivnað ella tað at vera partur í einum felagsskapi, stendur í tilmælinum, sum er, at Eysturkommuna brúkar pengar til góða sálarheilsu, trivnað, menning og fyribyrging hjá børnum og ungum.