Suffía Nón er ársins íverkseti

Vaskikona, sniðgevi, roknskaparfólk og stjóri.

Hesi eru bert nøkur av heitunum, Suffía Nón hevur, tá hon er til arbeiðis í fyritøkuni Fjord, sum hon eigur og rekur. 

Í farnu viku bleiv Suffía Nón kosin ársins íverkseti 2024.

- Herfyri var eg í gongd við at vaska vesi, tá eg brádliga mátti út í handilin at avgreiða kundar, sigur Suffía Nón, tá hon svarar spurninginum, hvussu tað er at hava egna fyritøku.

Tað var afturi í 2017, at Suffía Nón avgjørdi at siga sítt fasta starv sum sniðgevi frá sær og seta hol á ein gerandisdag sum íverkseti.

- Tá var Fjord byrjað at fylla so mikið nógv, at eg noyddist at velja. Eg valdi at geva tí eina roynd í eitt ár, sigur Suffía Nón.

Eitt ár bleiv til fleiri afturat, og í dag gongur so mikið væl í fyritøkuni, at Suffía Nón hevur heili fimm fólk á lønarlistanum. Harafturat samskiftir hon í løtuni við útlendskar fyritøkur, ið vilja umboða vørurnar frá Fjord í útlandinum.

Í morgunsendingini fortelur Suffía Nón millum annað um hugskotið at hava egna fyritøku og gerandisdagin sum íverkseti.